"Análisis de una época" recolle os artigos publicados por Enrique Santín ao longo de catro décadas en distintos medios de comunicación nos que colaborou de forma asidua: Madrid, Pueblo, Arriba, Informaciones, Ya, Abc, El País, El Correo Gallego e El Progreso de Lugo, xunto con algúns escritos que permanecían aínda inéditos.

Desde a perspectiva do tempo transcorrido, o lector comprobará que os escritos deste humanista librepensador nos resultan sorprendentemente actuais; a súa análise política, certera e clarificadora do momento presente, e as súas propostas, tremendamente vixentes.

De aí a importancia de recompilar este valioso testemuño do tempo da transición democrática española, contado desde a posición privilexiada de quen viviu moitos deses acontecementos históricos en primeira persoa.

O libro foi prologado polo presidente do Consello de Estado, José Manuel Romay Beccaría, quen, desde a admiración e a amizade persoal, sintetiza con gran precisión a aportación dos escritos e a traxectoria profesional de Enrique Santín á España democrática actual. Séguelle unha introdución doutro galego ilustre, Fernando Ónega, en homenaxe ao espírito asociacionista de Santín e a súa contribución aos galegos de dentro e fóra de Galicia. O corpo da obra estrutúrase en diferentes bloques temáticos: o primeiro deles constitúe unha mirada lúcida sobre Galicia e a alma galega; continúa cunha análise da España da transición desde as súas diferentes vertentes: social, política, económica, de goberno, autoritarismo e democracia, capitalismo e marxismo, seguridade e orde pública, organización territorial do Estado, crítica ao poder político; para cerrar con dous artigos sobre a Xustiza e as súas relacións coa política, e o desempeño da profesión de avogado como referente ético da sociedade.

ENRIQUE SANTÍN é natural de Lugo. Obtivo o Premio Extraordinario Fin de Carreira na Facultade de Dereito pola Universidade de Santiago de Compostela e graduouse en Estudos Sociais na Escola Social da devandita universidade. Personalidade de recoñecido prestixio no ámbito xurídico, alternou o exercicio da Avogacía co desempeño da docencia como profesor de Dereito Romano na Universidade Complutense de Madrid.

Conta cunha destacada traxectoria na Administración Pública: delegado de Información e Turismo de Lugo, Asturias e A Coruña; ponente rexional de Turismo do Consello Económico e Social de Galicia; xefe da Inspección Xeral de Servizos do Ministerio de Información e Turismo; secretario xeral do programa de promoción Profesional Obreira; asesor da Dirección Xeral de Promoción Social do Ministerio de Traballo; xefe de distintos gabinetes técnicos no Ministerio de Traballo, no da Presidencia do Goberno, Gobernación e Interior, e Secretario Xeral Técnico do Ministerio do Interior.

Foi fundador e presidente de honra da Asociación de Empresarios Galegos en Madrid, presidente da Federación de Asociacións de Empresarios Galegos no Exterior e da Asociación Cultural da Vieira, exvicepresidente do Centro Galego de Madrid, socio de honra da Asociación de Médicos Galegos, do Club de Periodistas Galegos en Madrid, etc.

Desde 1980 dedicouse á empresa privada: fundou e preside o Grupo de Empresas CLINER, e é presidente das sociedades ACUMULA S.A., AGARIMARIA S.A., BARXA MAYOR S.L. e KAPA INTEGRAL S.A.

Foi distinguido con numerosas condecoracións: ao Mérito Civil, Alfonso X El Sabio, Cardenal Cisneros, Mérito Militar con distintivo branco, San Raimundo de Peñafort, Comendador da República Italiana, Medalla de Ouro da Cámara venezolano-española de Industria e Comercio, Insignia de Ouro da Asociación de Médicos Galegos e Medalla "Paul-Harris Fellow" de Rotary International.